والدین کے حق

بسم اللہ الرحمٰن الرحیم

اسلام ، خاندان کو بہت ہی اہمیت دیتا ہے اور اس کےدرمیان محبت و احترام کی تاکید کرتاہے اور اس خاندان کی اساس اور بنیاد والدین ہیں۔

اسی لئےاللہ تعالی کےہاں سب سےمحبوب اور افضل عمل والدین سے نیکی کرنا قرار پایا ۔ 

والدین سے نیکی ان کی اطاعت و فرمانبرداری اور ان کا احترام اور ان کےسامنے تواضع اور ان کے لئےاحسان کر کےہوگی اور یہ کہ ان پرخرچ کیا جائے اور ان کے لئے دعا کی جائے اور ان کے رشتہ داروں سے صلہ رحمی کی جائے اور ان کےدوست و احباب کی عزت و احترام کیا جائے ۔ 

اللہ تبارک وتعالی کافرمان ہے ‫: 

اورتیرے رب نےفیصلہ کردیاہےکہ اس کی عبادت کےعلاوہ کسی کی عبادت نہ کرو اور والدین کےساتھ احسان اوراچھا سلوک کرو

( سورة بني اسرآءيل : 17 ، آیت : 23 )

اور ان حقوق میں والدہ کاحق سب سے زیادہ اور عظیم ہے کیونکہ وہ دراصل والدہ ہی ہے جس نے اس کاحمل اٹھایا اور پھر وہی ہے جس نےاسے جنا اور وہی ہے جس نے اسےدودھ پلایا ۔ 

عن أبي هريرة ـ رضى الله عنه ـ قال جاء رجل إلى رسول الله صلى الله عليه وسلم فقال يا رسول الله من أحق بحسن صحابتي قال ‏"‏ أمك ‏"‏‏۔‏ قال ثم من قال ‏"‏ أمك ‏"‏‏۔ قال ثم من قال ‏"‏ أمك ‏"‏‏۔ قال ثم من قال ‏"‏ ثم أبوك ‏"‏‏۔

حضرت ابو ھریرہ رضی اللہ عنہ نے بیان کیا کہ ایک صحابی رسول کریم صلی اللہ علیہ وسلم کی خدمت میں حاضر ہوئے اور عرض کیا ‫:

یا رسول اللہ (صلى الله عليه وسلم) ! میرے اچھے سلوک کا سب سے زیادہ حقدار کون ہے؟

آپ (صلى الله عليه وسلم) نے فرمایا : تمہاری ماں ہے۔

صحابی نے پھر پوچھا کہ : اس کے بعد کون ہے؟

آپ (صلى الله عليه وسلم) نے دوبارہ فرمایا کہ تمہاری ماں ہے۔

انہوں نے پھر پوچھا کہ : اس کے بعد کون؟

آنحضرت (صلى الله عليه وسلم) نے فرمایا : تمہاری ماں ہے۔

انہوں نے پوچھا کہ اس کے بعد کون ہے؟

آنحضرت (صلى الله عليه وسلم) نے فرمایا : پھر تمہارا باپ ہے۔

صحیح بخاری ، كتاب الادب ، باب : من احق الناس بحسن الصحبة ، حدیث : 6037