حلیہ مبارک

حلیہ مبارک
از امام ابن حزم

رسول اللہ ﷺ نہ بہت لانبے تھے نہ پستہ قد ، بلکہ آپ کا قد مبارک درمیانہ تھا ۔ رنگ کے اعتبار سے آپ نہ بالکل سفید تھے نہ گندم گوں ، بلکہ رنگ سفیدی کے ساتھ سرخی لیے ہوئے تھا۔ چہرہ مبارک چودھویں رات کے چاند کی طرح روشن ، چمک دار، سر کے بال نہ بالکل سیدھے نہ بالکل پیچ دار بلکہ ہلکی ہلکی سی پیچیدگی کے ساتھ گھونگھریالے تھے ۔ اعضاء کے جوڑوں کی ہڈیاں موٹی اور پر گوشت تھیں ۔ پلکیں سیاہ سرمگیں ۔ آنکھوں کی سفیدی میں باریک سرخ ڈورے ، دندان مبارک خوب صورت چمک دار۔ دہن اعتدال کے ساتھ فراخ یعنی تنگ نہ تھا ، ناک خوب صورت ، رفتا ر تیز تھی ، چلتے تھے تو معلوم ہوتا تھا کہ آپ ڈھلواں زمین پر اتر رہے ہیں ۔ جب آپ توجہ فرماتے تو پورے بدن کے ساتھ فرماتے یعنی صرف گردن پھیر کر متوجہ نہیں ہوتے تھے ۔ نگاہ اکثر نیچی رہتی تھی ۔ ہتھیلیاں پر گوشت اور ملائم تھیں ۔ ایڑی میں گوشت کم تھا۔ ریش مبارک گھنی اور بال سیاہ تھے۔ آپ کے پاؤں کے تلوے قدرے گہرے تھے ۔ سر کے بال زیادہ لانبے ہوتے تو کان کی لو تک یا شانے تک پہنچ جاتے تھےے ورنہ نصف کان کی لو تک یا شانے تک رہتے تھے ، آپ کے سر اور داڑھی کے بال بیس سے زیادہ سفید نہ تھے یعنی گنتی کے بال سفید تھے ۔

(جوامع السیرۃ : امام ابو محمد علی بن احمد بن سعید بن حزم م ۴۵۶ھ)
اقتباس : تجلیات نبوت از مولانا صفی الرحمن مبارک پوری